Harkovdaki Moskva rayon mahkemesi yanında yüz bergen patlavğa alâqası olğan adamlarnı yaqalav boyunca mahsus tedbirler başlandı. Patlav neticesinde ondan ziyade insan, şu cümleden 4 genç qız yaralandı.
Bunı Ukraina havfsızlıq şurasınıñ reis mesleatçısı Markiyan Lubkivskiy Facebook saifesinde bildirdi.
«Ukraina havfsızlıq hızmetiniñ reisi ve içki işler naziri Harkovda olıp keçken patlavdan soñ Ukraina havfsızlıq hızmeti, içki işler nazirligi ve prokuratura hadimleri kirgen ayrı ştab qurulması aqqında haber eteler. Harkovda cinayetçilerni yaqalav tedbirleri ilân etildi. Terrorizmge qarşı tedbirler keçirilmekte», – dep qayd etii Lubkivskiy.
Onıñ malümatına köre, patlav neticesinde 14 kişi yaralandı.
Prokuratura bazarertesi künü, yanvar 19-da, Harkovdaki mahkeme yanında olıp keçken patlavnı «terakt» olaraq tanıy.
İlk malümatlarğa köre, patlav maddesi mahkeme yanında qoyuldı, dep bildirdi Harkov vilâyet devlet memuriyetiniñ reisi İgor Baluta. Onıñ aytqanına köre, adamlar mahkeme binasından çıqqanda patlav yüz berdi.
Vaqia yerinde mütehassıs ve uquq qoruyıcılar çalışmaqta.
Ukraina içki işler naziriniñ mesleatçısı Anton Geraşçenko bildirdi ki, bir kişi ğayet ağır alda hastahanede buluna, altı insannıñ alı ağır, daa altı kişi ciddiy olmağan yaralar aldı.
«Bugün Harkovdaki Moskva rayon mahkemesi yanında olğanlar evelden planlaştırılğan ve azırlanılğan terroristik akttır», – dep qayd Geraşçenko Facebook saifesinde.
Soñki aylar devamında Harkovdaki demir yolu ve arbiy bölükler yanında patlavlar sıq-sıq olıp keçe.
