Minsk añlaşmalarına riayet etilse, Ukraina ateş toqtatılması aqqında añlaşmanı imzalamağa azır. Bunı bazarertesi künü, yanvar 19-da, Ukraina prezidenti Petro Poroşenko bildirdi, – dep haber ete Radio Svoboda.
Poroşenkonıñ aytqanına köre, Ukraina «üç taraflı kontakt gruppasınıñ çağırılması, tışqı işler nazirleriniñ toplaşuvı ve Astanada ya da başqa bir yerde «norman formatında» sammit keçirilmesine» azır.
Malüm olğanı kibi, yanvar 15-ne keçirilmesi belgilengen Donbass zıddiyeti boyunca Ukraina, Almaniya, Frenkistan ve Rusiye reberleriniñ körüşüvi ötkerilmedi.
Almaniya kantsleri Angela Merkel Rusiye prezidenti Vladimir Putinge dedi ki, körüşüvniñ esas şartlarından biri Minsk añlaşmalarına riayet etilmesi qala.
Ukrain askerleri bildireler ki, soñki künleri terrorizmge qarşı tedbirler keçirilgen yerlerde Rusiyege qoltutqan boyevikler tarafından sıq-sıq ateş açılıp başladı.
