Link açıqlığı

Qırımnıñ sağlıq saqlav müessiselerine keçici müddetni arttırdılar


İşğal etilgen Qırımda sağlıq saqlav müessiseleriniñ litsenziyaları 2015 senesi iyün 1 kününe qadar qalar. Bunı Qırım «sağlıq saqlav nazirliginiñ» matbuat hızmeti bazarertesi künü, yanvar 19-da, bildirdi.

Hızmetniñ malümatına köre, böyle bir deñişmeler «Rusiye Federatsiyası terkibine Qırım Cumhuriyetiniñ qabul etilmesi ve Rusiye Federatsiyasında yañı subyektler – Qırım Cumhuriyeti ve Aqyar federal şeeriniñ – meydanğa ketirilmesi aqqında» Federal anayasa qanunına deñişmeler kirsetilmesi aqqında» №20-FK3 Federal anayasa qanunı ile kirsetildi.

«Vesiqağa binaen, tedaviylev esnasını bozmamaq içün Qırım Cumhuriyetiniñ sağlıq saqlav müessiselerine Rusiye qanunlarına köre ğayrıdan qayd olmaq ve litsenziya vesiqalarını azırlamaq içün vaqıt berile», – aytıla beyanatta.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG