İşğal etilgen Qırımda daa bir qırımtatarını «Ermeni Bazar işi» boyunca yaqaladılar, – onı da 2014 senesi mayıs 3-te qırımtatar halqınıñ lideri Mustafa Cemilevni qarşılağanda politsiya hadimine qarşı küç qullanmasında qabaatlaylar, – dep haber ete Qırım.Aqiqat.
Bazarertesi künü, yanvar 19-da, Qırımtatar halqınıñ aq-uquqlarını qorçalav komitetiniñ reisi Eskender Bariyev Facebookta bildirdi ki, Edem Osmanovnı qoranta azalarınıñ yanında yaqaladılar.
«Qırımtatar halqınıñ aq-uquqlarını qorçalav komitetiniñ telefon ağına kelgen malümatqa köre, bugün, Aqmeçit qasabasında, yaqarlıq noqtasında, tahminen saat 11.00 34 yaşında Osmanov Edem yaqalandı. Edem qorantasınen bulunğan maşinanıñ yanına beyaz «Gazel» keldi. «Gazelden» betleri qapatılğan beş insan çıqıp, Edemni gazelge oturttılar ve belli olmağan bir yerge alıp kettiler», – dep haber etti Eskender Bariyev.
Onıñ aytqanına köre, birazdan belli oldı ki, Edem Osmanovnı Aqmescitte Trenev bulvarı 16 adresi boyunca taqiqat bölügine ketirdiler.
Erkekni Rusiye Federatsiyası Cinaiy kodeksiniñ 318-inci maddesi («Akimiyet vekiline küç qullanuv») boyunca yañlış areketlerde şekleyler.
«Mayıs 3 kününiñ vaqialarından sebep 318/1 maddesi boyunca yaqalandı. Sentâbr ayında ana-babasınıñ evinde tintüv keçirilgen edi, oktâbr ayında ise mahkeme qararı ile anasına mayıs 3-te qırımtatarlarnıñ lideri Mustafa Cemilevni Qırımğa kirsetmegen künü yolnı qapatqanından sebep 10 biñ rublelik para cezası berildi», – dep añlattı Bariyev.
Malüm ki, 2014 senesi mayıs 3-te Ermeni Bazarda Mustafa Cemilevni qarşılağan bir qaç kişi SİZOdan azat etildi. Edem Ebulisov, Tair Smedlâyev, Musa Apkerimov, Rustam Abdurahmanov azatlıqqa çıqtılar.
Mahkemeden aldın taqiqat devam etmekte.
