İşğal etilgen Qırımda Ukraina şarqından köçip kelgen ve qayd olunmağan insanlarnıñ sayısı beş biñni teşkil ete, dep tüşüne Qırım ombudsmeni Lüdmila Lubina. Onıñ fikirince, Qırımda köçip kelgenlerniñ sayısı artsa, «işsizlik ve cinayetlik seviyesi de artacaq». Bunı İnsan aqları boyunca Qırım alan missiyasınıñ dekabr ayı boyunca esabatında aytıla.
Qırım «Federal migratsion hızmetiniñ» malümatına köre, Ukraina şarqınıñ 16 biñ 790 sakini vaqtınca mesken yardımını istedi.
Lüdmila Lubinanıñ zanınca, beş biñ insan mustaqil evlerde qayd olmayıp yaşay.
Malüm ki, Qırım alan missiyası Qırım yarımadasında 2014 senesi mart 5-ten itibaren monitoring faaliyetini alıp bara.
Qırım alan missiyası er ay 2014 senesi mart 16-dan soñ Qırımda insan aqları vaziyetini aydınlatqan analitik esabat azırlay.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
