Rusiyeniñ Perm ülkesiniñ sakinleri uçuş fiyatınıñ bir qısmını ödep, Qırımğa barıp kele bilecekler. Bunı Perm ülkesiniñ beden medeniyet ve sport naziri Pavel Lâh bildirdi, – dep haber ete bazarertesi künü, yanvar 19-da, «Krım Media» agentligi.
Nazir dedi ki, Prikamye Rusiyeniñ daa 30 regionı ile beraber «Qara deñiz yalısınıñ kurort inkişafı» programmasına kirsetilgen.
«Onıñ çerçivesinde Rusiye sakinleri, şu cümleden çetel ziyaretlerinden marum qalğan vatandaşlar, eñ evelâ ucuz Qırım uçuşlarından faydalana bilecekler», – dep ayttı Pavel Lâh.
Onıñ malümatına köre, uçuşlar aprel ayında başlaycaqtır.
Berilgen malümatqa köre, leyha Rusiye medeniyet nazirligi, Rusiye naqliyat nazirligi, Turizm federal agentligi ve Rusiye turistik sanayı birliginiñ qoltutuvı ile ömürge keçirilmekte.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
