Çeçenistan Rusiye cumhuriyetiniñ paytahtı Groznıyde, şeerniñ merkeziy camisi yanında, Muhammed Peyğamberge yapılğan karikaturalarğa qarşı narazılıq numayışı keçirile.
«Bütün alemge bunı aytmalımız: biz Muhammed Peyğamberni sevemiz ve musulmanlarnıñ diniy duyğularını aqaretlemege izin bermemiz», – dedi Rusiye baş müftisi Ravil Gaynutdin.
Aynı zamanda o, islâmistler tarafından etilgen terraktlarnı takbih etti. Müfti diniy degerlerni bozğan Ğarpnı ve bir cınıs arasında evlenüvni musaade etken memleketlerni tenqit etti.
Diger dinlerniñ temsilcileri de mitingge qoşuldılar, insanlardan biri: «Muhammed ve İisus» qıçırıp ayta edi.
Pariste, yanvar 7 künü, boyevikler «Charlie Hebdo» satirik mecmuasınıñ muarririyetine ücüm ettiler, 12 insan elâk oldı. Ücüm mesülietini özüne «Arabistan yarımadasında Al Kaida» teşkilâtı aldı.
