Qırımtatar Milliy Meclisiniñ Ukraina devlet akimiyeti organları, Ukraina halq deputatları ve qıtaiy Ukrainada olğan qırımtatar cemaat teşkilâtlarınıñ azaları ile sıq munasebetiniñ pekitilmesi içün Kiyevde Meclis reisi uzurında er cuma künü keçirilecek muşavere teşkil etildi.
Meclis reisiniñ matbuat hızmeti bergen malümatqa köre, cuma künü, yanvar 16-da, Muşavereniñ birinci toplaşuvında qırımtatarlarnıñ milliy yetekçisi, Ukraina prezidentiniñ qırımtatar halqınıñ işlerinden vekâletlisi Mustafa Cemilev, Meclis reisiniñ muavini, Qırım Muhtar Cumhuriyeti ve Aqyar işleri boyunca Departament müdiri Aslan Ömer Qırımlı, Ukraina halq deputatı Georgiy Logvinskiy, Ukraina prezidentiniñ qırımtatar halqınıñ işlerinden vekâletlisiniñ faaliyetini temin etüv bölüginiñ reberi Arsen Jumadilov, «Qırım cemiyeti» cemaat teşkilâtınıñ koordinatorı Refat Ümerov, Qırımtatar Milliy Qurultayınıñ vekili Rustem Ümerov, ve daa bir sıra ekspert iştirak ettiler.
Muşavereni Qırımtatar Milliy Meclis reisi Refat Çubarov alıp bardı.
Toplaşuv iştirakçileri temsil etken teşkilâtlarnıñ 2014 senesi faaliyetiniñ neticelerini ve 2015 senesine olğan planlarını taqdim ettiler. Bundan da ğayrı, muşavere iştirakçileri işbirlik qurıp, Qırımnıñ işğalden azat etilmesiniñ strategiyası, «Qırımtatar halqınıñ statusı aqqında» Ukraina Qanun leyhası, Qırım Muhtar Cumhuriyetiniñ Anayasa leyhası üzerinde çalışmağa qarar aldılar.
Qırımtatar Milliy Meclisiniñ reisi uzurında nevbetteki Muşavere 2014 senesi yanvar 23-de keçirilecek.
