Qırımtatar halqınıñ aq-uquqlarını qorçalav komiteti azalarına matbuat konferentsiyasında belgisiz şahıslar zelönka septirgeninden bir ay keçti, amma uquq qoruyıcı organlar alâ daa taqiqat neticelerini taqdim etmediler. Bunı Qırım.Aqiqatqa Qırımtatar halqınıñ aq-uquqlarını qorçalav komiteti reberi Eskender Bariyev añlattı.
«Tarikni meydanğa ketirgen insanlarğa nisbeten ariza yazğan edik. Taqiqatçılar kele, malümatnı toplay, kirli urbamıznı fotoğa çekken edi. Amma bunıñ neticesini biz şimdilik körmeymiz», – dedi Bariyev.
O, cumaertesi, yanvarniñ 17-de, Qırımtatar halqınıñ aq-uquqlarını qorçalav komitetiniñ konferentsiyasına da aynı şu insanlar keder etkenini tüşüne.
Bunıñ ile Bariyev şunı da qayd etti ki, şu ziddiyet iştirakçilerine, añlaşma şartlarını bozmamaq içün, şikâyet etmecek eken: «Bunı teşkil etken insanlarnıñ adını aytmacam, dep söz berdim».
Qırım.Aqiqat bergen malümatqa köre, dekabr 10-da İnsan aqları kününe bağışlanğan tedbirlerniñ akimiyet tarafından yasaq etilmesi munasebeti ile keçirilgen matbuat konferentsiyası vaqtında belgisiz şahıs zalğa sürip, Qırımtatar halqınıñ aq-uquqlarını qorçalav Komitetiniñ koordinatorları – Eskender Bariyev, Sinaver Kadırov ve Abmecit Suleymanovğa zelönka septirdi.
Cumaertesi, yanvar 17-de, Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyası ötkerilgen binağa belli olmağan şahıslar kirip, tedbir teşkilâtçılarına ücüm ettiler.
