Link açıqlığı

Kiyevde Barışıq yürüşi keçirilmekte: «Men – Volnovaham»


Ukraina paytahtında Şevçenko adına Kiyev milliy universitetiniñ baş binasından Barışıq yürüşi başlandı.

Onıñ iştirakçileri bu afta Donbasstaki Volnovaha civarında ücüm neticesinde elâk olğanlarnı, em de Ukraina şarqında cenk uruşlarında can bergenlerni añdılar. Adamlarnıñ qollarında «Men – Volnovaham» levhaları bar, dep haber ete Radio Svoboda.

Yürüşke Kiyev patriarhatınıñ Ukrain ortodoks kilsesiniñ papazı Filaret ve Ukrain yunan-katolik kilsesiniñ papazı Svâtoslav qoşuldılar, soqaqlarğa arbiy oquv yurtlarınıñ kursantları da çıqtı.

Malüm ki, salı künü, yanvar 13-te, Donetsk vilâyetiniñ Volnovaha civarındaki Bugas mesken yerinde ukrain arbiyleriniñ «Kiyev-2» blokpostına ateş açıldı. Bunıñ neticesinde blokpost yanında turğan avtobusta 12 insan elâk öldi ve 16 kişi yaralandı, eki ukrain arbiyi de can berdi. Ukrain askerleri bildire ki, ateş «Graddan» açılğan edi. Bunı video levhaları ve vaqia yerinde tapılğan raketa parçaları tasdıqlay. Arbiylerniñ aytqanına köre, ateş Donetsk vilâyetiniñ Dokuçayevsk şeerinden açıldı.

Separatistler ve olarnıñ tarafdarları bildire ki, ücüm ile alâqaları yoq, yolcular avtobusını ise ukrain askerleri yoq ettiler.

Bundan evel separatistler içtimaiy ağlarda Volnovaha civarında ukrain blokpostı yoq etildi, dep maqtandılar. Adamlar öldürilgeni aqqında malümat berilgen soñ ise bu mesaclarnı silip başladılar.

XS
SM
MD
LG