Rusiye tarafından işğal etilgen Qırımda ğayıp olayatqan tamır halqlar, qırımtatarlar, qaraylar ve qırımçaqlarnıñ gençlerini qorçalav analar komitetini qurıp, Rusiye Silâlı quvetlerinde askerlikten çetleştirecek olalar.
Bu aqqında Qırımtatarlarnıñ aq-uquqlarını qorçalav komitetiniñ bütünqırım konferentsiyasında qabul etilgen rezolütsiyada aytıla, dep haber ete Qırım.Aqiqat mühbiri.
«Rusiye Federatsiyasınıñ silâlı quvetlerine qırımtatar gençlerini çağıruv qırımtatar, qaray ve qırımçaqlarnı ğayıp oluv havfı altında qaldıra», – aytıla beyanatta.
Rezolütsiyada aytıla ki, Qırımnıñ er angi akimiyeti qırımtatarlarnıñ razılığından soñ tiklenmeli. Vesiqağa binaen, akimiyet organları qabul etken qararlar qırımtatar halqı ve Qırım sakinlerine fayda ketirmeli.
Bundan ğayrı, rezolütsiyada aytıla ki, qırımtatar, qaray ve qırımçaq halqlarınıñ aq-uquqlarını ğayrıdan tiklev meselesinde tarihiy adlarnıñ qaytarılması ğayet müim.
Konferentsiyada Birleşken milletler teşkilâtınıñ baş kâtibine muracaat qabul etildi. İştirakçiler tamır halqnı yoq etilmesinden qorçalamağa rica eteler.
Qırım.Aqiqat bildirdi ki, cumaertesi künü, yanvar 17-de, Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyası ötkerilmeli. Tedbir yerli saatine köre saat 11-de Vorovskiy soqağındaki Marakand qavehanesinde başlanmalı.
Tedbir başlanmazdan evel konferentsiyanı bozacaq olğan adamlar keldi. Soñra olarnıñ yanına daa yigirmi kişi keldi, olar konferentsiya iştirakçileri qayd olunğan binağa «provokatorlar» qıçırıp kirmege tırıştılar.
Konferentsiya iştirakçilerinden biri bildirdi ki, politsiyanı Meclis vekilleri çağırdı.
Tedbir teşkilâtçıları bildire ki, konferentsiyada qırımtatar halqınıñ al-vaziyeti, qırımtatarlarnıñ Rusiye ordusında hızmeti ve topraq meseleleri baqılacaq.
