Link açıqlığı

«Milletlerara munasebetler komiteti» Türkiye tış işler nazirliginiñ qırımtatarlarğa basqı yapılğanı aqqında malümatını red ete


Qırımnıñ milletlerara munasebetler ve sürgün olunğan grajdanlarnıñ işleri boyunca «devlet komitetiniñ» reisi Zaur Smirnov Türkiye tış işler naziriniñ Qırımda qırımtatarlarğa basqı yapılğanı aqqında beyanatını yalan dep adladı.

Bunı «komitetniñ» matbuat hızmeti bildire.

«Şunı qayd etmeli ki, Türkiye tış işler nazirine berilgen malümat, mence, izaatlar berilmesini talap ete. Qırımtatar tili Qırımda Qırım Cumhuriyetiniñ Anayasası qabul etilgeninden itibaren devlet tili sayıla, Rusiye Federatsiyasınıñ prezidenti Vladimir Vladimiroviç Putin ise Qırımnıñ repressiyalarğa oğratılğan halqlarnıñ reabilitatsiyası aqqında buyruqnı imzaladı, böylece qırımtatarlar meselesinde tarihiy adalet ğayrıdan tiklenmeli. Ukraina bunı 23 yıl devamında körmemezlikke urğan edi», – aytıla Smirnovnıñ izaatında.

«Komitet» yolbaşçısı qayd etti ki, «aman-aman er bir nazirlik ve icra akimiyet organında qırımtatar halqınıñ vekilleri yer almaqta».

«Er keske, şu cümleden Türkiye tış işler nazirligine aytam ki, qırımtatarlarnıñ aq-uquqları qorunmaqta», – dey Smirnov.

O, 2014 senesi mayıs 3-te Mustafa Cemilevni qarşılağan qırımtatarlarnı apiske aluvnı doğru tanıp, işbu körüşüv teşkilâtçılarını tenqit ete.

«Uquq qoruyıcı organlar bozuvlardan sebep bir sıra cinaiy işni açtı. Maalesef, bu tedbirniñ teşkilâtçıları olğan şahıslar iştirakçilerni, adiy grajdanlarnı, taşlap kettiler. Bu memuriy mesüliyetke çekilgen adamlarnıñ para cezaları ve uquq yardımı ile bağlı. Bizler cezalarnı yımşatmaq içün elinden kelgenini yaptıq. Cinaiy mesüliyetke çekilgen adamlarnı endi aytmayıq – adamlar apiste qalıp, Kiyevde bulunğan teşkilâtçılardan yardım isteseler de, olarnıñ ricaları eşitilmedi», – dep tekrarlay Smirnovnıñ aytqanlarını matbuat hızmeti.

Memur dedi ki, yarımadada ğayıp olğan qırımtatarlarnı qıdıralar ve «bu faciağa oğrağan er bir qorantanıñ menfaatları köz ögüne alına».

O, Türkiye eyyetini Qırımğa davet etip, tamır halqnıñ aqları sıñırlanmağanını kösterecek ola.

«Eminim, Türkiye tış işler nazirine qırımtatarlarnıñ vaziyeti aqqında malümat bergen insanlarnıñ maqsadı bam-başqa edi, olar Qırım Cumhuriyetiniñ akimiyetini, em de Rusiye Federatsiyasınıñ prezidenti Vladimir Vladimiroviç Putinni lekeleycek olalar. Türkiye tarafı qırımtatarlarnıñ aq-uquqları sıñırlana degen malümatqa cevabımıznı körer, dep ümüt etem», – dedi Smirnov.

Türkiye tış işler naziri Mevlüt Çavuşoglu bildirdi ki, Rusiye Türkiyege qırımtatarlar ile bağlı bergen vadelerni yerine ketirmedi. Çavuşoğlunıñ aytqanına köre, Vladimir Putin Qırımğa resmiy Türkiye eyyetini kirsetmege razı oldı. İşbu eyyet qırımtatar halqınıñ vaziyetini ögrenecek. Türkiye eyyeti eñ yaqın vaqıtta Qırımğa yol alacaq, dep ayttı Çavuşoğlu.

Uquq qorçalayıcılar qırımtatarlarğa yapılğan basqı aqqında bir çoq kere aytqan ediler. Ukraina tış işler nazirligi qırımtatarlarnıñ vaziyetini ekinci sürgünlik dep adladı.

XS
SM
MD
LG