Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyası ötkerilgen binağa belli olmağan şahıslar kirip, tedbir teşkilâtçılarına ücüm ettiler, dep haber ete Qırım.Aqiqat mühbiri.
Böylece, belli olmağan şahıslar salonğa kirip, Komitet reisi Eskender Bariyevge ücüm ettiler. Tedbir iştirakçileri qarşılıq köstermeyip, zıddiyetke yol bermemege tırışalar.
«Konferentsiya iştirakçileri qollarını köteriñiz, politsiya bir kimseni urmağanımıznı körsin», – dep rica etti Bariyev.
Jurnalistlerniñ kimsiñiz sualine «sportçılar» cevap bermeyip, betlerini kameralardan saqlaylar.
Qırım.Aqiqat bildirdi ki, cumaertesi künü, yanvar 17-de, Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyası ötkerilmeli. Tedbir yerli saatine köre saat 11-de Vorovskiy soqağındaki Marakand qavehanesinde başlanmalı.
Tedbir başlanmazdan evel konferentsiyanı bozacaq olğan adamlar keldi. Soñra olarnıñ yanına daa yigirmi kişi keldi, olar konferentsiya iştirakçileri qayd olunğan binağa «provokatorlar» qıçırıp kirmege tırıştılar.
Konferentsiya iştirakçilerinden biri bildirdi ki, politsiyanı Meclis vekilleri çağırdı.
Tedbir teşkilâtçıları bildire ki, konferentsiyada qırımtatar halqınıñ al-vaziyeti, qırımtatarlarnıñ Rusiye ordusında hızmeti ve topraq meseleleri baqılacaq.
