Bu daqqaları Aqmescitte Qırımtatar halqınıñ aq-uquqlarını qorçalav komiteti keçirgen konferentsiyağa politsiya kelip, tedbirni bozacaq olğan adamlarnı tınçlandırmağa tırışa, dep haber ete Qırım.Aqiqat mühbiri.
Konferentsiya iştirakçilerinden biri bildirdi ki, politsiyanı Meclis vekilleri çağırdı.
Uquq qoruyıcılar «razı olmağanlarnı» tınçlandırmağa tırışsa da, olar konferentsiya iştirakçileri ve teşkilâtçılarına küfür eteler. Neticede politsiya hadimleri eñ faal bir-eki kişini yaqalap, maşinağa oturtıp alıp ketti.
Konferentsiyağa qarşı çıqqanlarnıñ sayısı ep arta, olar özüni qırımtatar halqınıñ vekilleri olaraq tanıtalar, lâkin konferentsiya iştirakçilerinden biri narazılıq bildirgenler qırımtatarca añlamağanını qayd etti.
Miting iştirakçileri Borçoqraq (Fontanı) sakinleri olğanını aytalar.
«Lâkin aynı vaqıtta olarnıñ çoqusı tedbirde qayd olunmağa istemey – adı ve soyadını aytmay», – dep açuvlana konferentsiya iştirakçilerini qayd etken qadınlardan biri.
Teşkilâtçılar bu adamlarnı tanımaylar.
Al-azırda konferentsiya keçirilgen binanı onğa yaqın politsiya hadimi qorumaqta.
Qırım.Aqiqat bildirdi ki, cumaertesi künü, yanvar 17-de, Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyası ötkerilmeli. Tedbir yerli saatine köre saat 11-de Vorovskiy soqağındaki Marakand qavehanesinde başlanmalı. Tedbir başlanmazdan evel konferentsiyanı bozacaq olğan adamlar keldi. Soñra olarnıñ yanına daa yigirmi kişi keldi, olar konferentsiya iştirakçileri qayd olunğan binağa «provokatorlar» qıçırıp kirmege tırıştılar.
Tedbir teşkilâtçıları bildire ki, konferentsiyada qırımtatar halqınıñ al-vaziyeti, qırımtatarlarnıñ Rusiye ordusında hızmeti ve topraq meseleleri baqılacaq.
