Link açıqlığı

Cemilev: Qırımğa raketalarnı ketirmege başladılar


Ukraina Yuqarı Şurasınıñ deputatı ve qırımtatarlarnıñ milliy yetekçisi Mustafa Cemilev

Ukraina Yuqarı Şurasınıñ deputatı ve qırımtatarlarnıñ milliy yetekçisi Mustafa Cemilev Radіo Svobodağa bildirgeni kibi, Rusiye işğalci akimiyeti Qırımğa özek aletlerini işlete bilgen raketalarnı ketirmege başlağan eken.

Amma o, raketalar içün işbu özek aletleri ketirildimi, yoqmı, tam olaraq daa bilmegenini qayd etti. Cemilev bu haberni yaqında ögrengenini aytıp keçti.

«Anda mezkür özek aletleri barmı-yoqmı – aytıp olamayım, amma raketa taşıyıcılarıdır. Yani Ukrainanıñ özek silâdan vazgeçüvi aqqında Budapeşt memorandumınıñ qaba bozuluvıdır. Şunıñ içün biz anda özek silânıñ olğanı aqqında malümatnıñ tasdiqalanmasından soñ mütenasip seslenüvge ümüt besleymiz. Amma bu pek yaramay bir vaziyettir», – dedi o.

Tış istihbarat hızmeti bu malümattan haberi olmağanını bildire.

Hızmet vekili Oleksandr Skripnik bu mesele boyunca ileride ATO spikeri Andriy Lısenoknıñ bildirüvlerine diqqat etmege çağırdı. Onıñ aytqanına köre, aynı Lısenkonıñ bildirüvleri Ukraina mudafaa tertibatı içün umumiy haber meydanı ola.

«Aytılacaq bir şey olsa, olar izaatlaylar, olmasa – yoq», – dedi Skripnik.

Soñki afta devamında ATO spikeri Andriy Lısenko işğal etilgen Qırımda raketalarnıñ olmasını izaatlamadı.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG