Yanvar 16 künü Aqmescitniñ merkeziy Kebir camisinde qırımtatar milliy areketiniñ faal iştirakçisi, belli uquq qoruyıcı Zampira Asanova hatırasına dua merasimi keçti.
Bunı Qırım musulmanları diniy idaresiniñ matbuat hızmeti bildire.
Duanı Kebir caminiñ imamı Niyaziy Ramazanov ve Qırım musulmanları diniy idaresiniñ hadimi Enver Nagaşev keçirdiler. Tedbirge qırımtatar cemaatçılığı, milliy areket veteranları, Zampira Asanovanıñ safdaşları qoşuldılar. Bunıñ ile dua merasiminde Qırım Müftisi hacı Emirali Ablayev de iştirak etti.
«Bugün halqı içün daima eyilikni yapqan, milletini qayğırğan Zampira Asanovanı añmaq içün toplaştıq. Müminlerniñ insan hatırasına yapa bilgen eñ eyi areketi – oña dua bağışlamaqtır. Biz bugün bu ulu insanlar içün dua oquymız, em bizim bala, torunlarımız da bunı etmek kerekler. Biz bu insannı ve ömürini halqımızğa feda etken iç bir vatandaşımıznı unutmamız. Allah rahmet eylesin!» – dedi Emirali Ablayev.
Hatırlatamız, qırımtatar milliy areketiniñ faal iştirakçisi, belli uquq qoruyıcı Zampira Asanova 2014 senesi yanvar 16 künü 72 yaşında vefat etti.
