Ukrainanıñ sabıq içki işler naziri Vitaliy Zaharçenko Rusiye vatandaşlığını qabul etti, amma bunıñ ile ukrain vatandaşlığından da vazgeçmege istemey. Bunı o işğal etilgen Aqyarda yanvar 16 künü keçirilgen brifing devamında bildirdi, dep haber ete «Krım Media».
Zaharçenko aytqanı kibi, «Rusiye birinci şahısları oña iş teklif etti». Şimdilik o, «Rustehnologiyalar» Rusiye devlet şirketinde mesleatçı olaraq çalışa. Ukrainanıñ sabıq içki işler naziri qorantası ile Moskvada yaşay.
Bunıñ ile, o, Ukraina vatandaşlığından vazgeçmeycegini bildirdi.
«Ukraina vatandaşlığından vazgeçmedim, em vazgeçmeycem. Bunı men Rusiyeniñ mahsus hızmetlerine de bildirdim», – dedi o.
Zaharçenko şunı da qoşıp ayttı ki, ukrain vatandaşlığı oña «iş içün» kerektir. Şu cümleden, o «Yevromaydan vaqtında yüz bergen adiselerni öz başına ögrenecegini» qayd etti.
İşğal etilgen Aqyarda yanvar 16-da «Cenüp-Şarq» hayriye fondu taqdim etilecek. Onıñ prezidenti Ukrainanıñ sabıq içki işler naziri Vitaliy Zaharçenko ola. Bu aqqında regional kütleviy haber vastalarına yollanılğan ilânda aytıla.
2014 senesi fevral 21 künü Ukraina Yuqarı Şurası içki işler naziri vazifelerini eda etken Vitaliy Zaharçenkonı istifağa yolladı ve Arsen Avakovnı Ukrainanıñ içki işler naziri vazifesine tayinledi. Matbuat vastaları bergen malümatqa köre, şu künü sabıq nazir «Sokol» mahsus bölüginiñ yardımı ile Ukrainanı terk etti.
2014 senesi fevral 28 künü Ukraina Baş prokuraturası MVD ve SBUdan Kiyevde fevral 18-22 künleri yüz bergen kütleviy öldürüvlerniñ teşkil etilmesinde qabaatlı Vitaliy Zaharçenkonı 10 kün içinde yaqalamağa talap etti. Mart 4 künü onı qıdıruvğa ilân ettiler.
2014 senesi mart 6 künü Avropa birligi ve Kanada Vitaliy Zaharçenkoğa nisbeten maliyeviy cezalarnıñ kirsetilmesi aqqında haber ettiler.
