Ukraina Baş prokuraturası yaqında İnterpol tarafından halqara qıdıruvğa ilân etilgen sabıq prezident Viktor Yanukoviç, sabıq baş nazir Nikolay Azarov ve diger ukrain memurlarını Rusiyeden çıqarmaq içün vesiqalarnı azırlay.
Bunı Ukraina baş prokurorı Vitaliy Yarema bildirdi.
«İnterpol Yanukoviç ve Azarovnı halqara qıdıruvğa ilân etti. Böyle etip bizim Rusiye Federatsiyasına muracaatta bulunıp, olarnı Rusiyeden Ukrainağa berilmesini ve cinaiy mesüliyetke çekilmesini talap etmek aqqımız bar», – dep qayd etti Yarema.
Yanvar 12-de Ukrainanıñ sabıq prezidenti Viktor Yanukoviç, onıñ oğlu Aleksandr Yanukoviç, sabıq baş nazir Nikolay Azarov, Raisa Bogatıreva, sabıq maliye naziri Yuriy Kolobov, «Ukrtelekom» şirketiniñ sabıq reberi Georgiy Dzekon halqara qıdıruvğa ilân etildi.
2014 senesi fevral ayında sabıq prezident Viktor Yanukoviç ve akimiyette yer alğan diger şahıslar Kiyevdeki Mustaqillik meydanında insanlar öldürilgen soñ Ukrainadan qaçtılar. Küzde Rusiye prezidenti Vladimir Putin dedi ki, 2014 senesi fevral ayında Rusiye Yanukoviçke Qırımğa qaçıp ketmege yardım etti.
Yanukoviçniñ bulunuv yeri belli degil. Soñki sefer onıñ matbuat konferentsiyası keçken sene aprel ayında Rusiyeniñ Rostov-na-Donu şeerinde keçirilgen edi.
