Yanvar 15-te Ukrainağa Qırım işğali vaqtında hırsızlanğan 3,7 milliard grivnanı keri qaytardılar, dep bildirdi Ukraina prezidenti Petro Poroşenko Yuqarı Rada fraktsiyalarınıñ reberleri ile toplaşuvda.
Bunı devlet yolbaşçısınıñ matbuat hızmeti bildire.
«Tünevin bizler Qırım işğali vaqtında hırsızlanğan 3,7 milliard grivnanı Ukrainağa keri qaytardıq», – dep ayttı Poroşenko.
Para aqqında tam bir malümat beyanatta yoq.
Malüm ki, 2014 senesi sentâbr ayında Ukraina Milliy bankınıñ yolbaşçısı Valeriya Gontareva bildirdi ki, Qırım işğali vaqtında yarımadada Milliy bank hazinelerinde 3,9 mlrd. grn bar edi.
2014 senesi mayıs 8-de silâlı adamlar Qırımda Ukraina milliy bankınıñ baş idaresi binasına kelip, Qırım hocalıq mahkemesiniñ qararı bar diye, onıñ faaliyetini blok etti.
Bu künleri Qırımnıñ öz başına ilân etilgen baş naziri Sergey Aksönov Qırımda Ukraina milliy bankınıñ Baş idaresiniñ para hazinelerinde bulunğan para ve diger qıymetli şeylerniñ inventarizatsiyası ile bağlı meselelerniñ al etilmesi boyunca işçi gruppasını meydanğa ketirmege avale etti.
