Link açıqlığı

Frenkistan akimiyeti kütleviy haber vastalarına din ile bağlı karikaturalarnı yapmağa vaqtında yasaq etse edi, Paristeki terakt olmaycaq edi, dep tüşüne Qırım müftisi acı Emirali Ablayev.

Böyle etip o, terakttan soñ çıqqan Charlie Hebdo sanını izaatladı. Mecmuada kene de Muhammed Peyğamberine karikaturalar bastırıldı, dep haber ete Qırım musulmanları diniy idaresiniñ matbuat hızmeti.

«Yüce Rabbiniñ peyğamberi, onıñ dini, onıñ muqaddes kitabını aşalamaq, onı taptamaq – büyük cailliktir. Bu dinni kütken milliarddan ziyade adam, halqlarnıñ diniy duyğularını aşalamaq demektir. Bir kimseniñ böyle bir aqqı yoq. Lâkin, yazıq ki, Frenkistan ükümeti, akimiyette yer alğanlar buña emiyet bermeyip, karikaturalarğa cevap bermediler, muarririyetniñ provokatsion faaliyetine yol berdiler. Demokratiya ve söz serbestligi aqqında aytılsa, prezidentni ve er kimseni tenqit etmek mümkün, musulman olsa da olmasa da, lâkin bir de bir halq kütken dinni, muqaddes Kitapnı, Peyğamberni aşalamaq bir kimseniñ aqqı yoq», – dep ayttı Qırım Müftisi.

Onıñ fikirince, dünyanıñ eñ azından üç din liderleri birleşse, qan tökülmesi toqtatıla bile.

«Meseleler avtomat ya da bombalar vastasınen al etilse, iç bir vaqıt dünyada amanlıq olmaycaq. Men mında yalıñız bir çaresini körem: üç dinniñ liderleri toplaşıp, qasevetlendirgen meselelerni muzakere etmege ve qan tökülmesi ve zorbalıqnı toqtatmaq kerekler, yalıñız o vaqıt adamlar barışıqta yaşap, bir-birini ürmet etecekler. Başqa çareni körmeyim», – dep qayd etti Qırım Müftisi.

Yanvar 7-de Frenkistanda Charlie Hebdo muarririyetine yapılğan ücüm ile bir sıra öldürüvler başlandı. Üç kün içinde 17 insan elâk oldı, şu cümleden 3 nefer politsiya hadimi. Eki mahsus tedbir devamında cuma künü üç terrorist yoq etildi.

Yanvar 10-da Frenkistanda tahminen 700 kişi zorbalıq qurbanlarınıñ hatırasına matem yürüşlerinde iştirak etti.

Mecmuanıñ yañı sanı 3 million nushadan ibarettir.

Mecmuanı inglizcege, arapçağa ve türkçege tercime ettiler.

Mecmuanıñ qapısında onıñ muarrirleri Muhammed peyğamberine karikaturalarnı bastırdılar.

XS
SM
MD
LG