Link açıqlığı

Ukraina tış işler nazirligi: Avropa parlamentiniñ qabul etilgen rezolütsiyası – Qırım işğalinden itibaren eñ küçlüdir


Ukraina tış işler nazirligi cumaaqşamı künü qabul etilgen Avropa parlamentiniñ rezolütsiyasını Rusiyeniñ Qırım işğalinden itibaren eñ küçlü olaraq tanıy. Bunı Ukraina tış işler nazirliginiñ hususiy vazifelerden elçisi Dmitriy Kuleba «Ukraina» telekanalında ayttı.

«Rezolütsiya yalıñız Rusiyeni ğayet sert şekilde takbih etmey. Eminim, Qırım işğali ve Donbass adiselerinden itibaren Avropa parlamentiniñ eñ küçlü rezolütsiyası budır», – dedi o.

Elçiniñ qayd etkenine köre, rezolütsiya öz başına ilân etilgen «Lugansk halq cumhuriyeti» ve «Donetsk halq cumhuriyetini» terroristik teşkilâtlar olaraq tanımasa da, terroristik areketlerni takbih ete. Diplomatnıñ fikirince, böyle etip Ukraina ve Avropa Birliginiñ bu meselede fikirleri aynı.

Malüm ki, yanvar 15-te Avropa parlamenti Rusiyeniñ Ukraina istilâsı devam etse, Rusiyege qarşı özek ve maliye saalarda cezalar quvetleştirilmeli, dep qayd etti. Rezolütsiya leyhası cumaaqşamı künü Avropa parlamentiniñ toplaşuvında qabul etildi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG