Ermenistan paytahtı Erivanda cumaaqşamı, yanvar 15-de, narazılıq iştirakçileri olarğa Rusiye elçihanesi ögünde Rusiye bayrağını yaqmağa keder etken politsiya hadimleri ile dögüştiler. Eki insan yaqalanğan – olardan biri – kinorejissör Tigran Hzmalân, – haber ete Radіo Svoboda.
Bunıñ ile Gümri ermeni şeerinde insanlar ermeni ailesiniñ altı azası ile vedalaşuv tedbirine toplandılar. Olarnıñ öldürüvinde Rusiye askerini qabaatlaylar. Rusiye arbiy bazası yerleşken Gümri kilsesine Ermenistan parlamentiniñ reisi Galust Saakân ve diger qanun ve cemaat erbapları keldi.
(canlı yayın)
Ermenistan baş prokurorı narazılıq iştirakçilerine vade etkeni kibi, Ermenistan Rusiyege öldürüvde qabaatlanğan insannı olarğa teslim etmege ricada bulunacaq eken.
Belli olğanı kibi, yanvar 12 künü Gümri şeerinde altı insandan ibaret olğan aile – qarı-qoca, olarnıñ oğlu, kelini, eki yaşında torunı ve evli olmağan qızı – öldürilgen edi. Yarım yaşında balaçıq yaralandı.
(canlı yayın)
Akimiyet bildirgeni kibi, Rusiye askeri Valeriy Permâkov, Moskvanıñ Cenübiy Kavkazda olğan eñ büyük arbiy obyektini terk etip, altı insannıñ öldürüvinde qabaatlı olğanını bildirdi. Askerni Rusiye sıñır bekçileri yanvar 13 künü ermeni-türk sıñırı yanında yaqaladılar
Malüm olğanı kibi, yanvar 14 künü Erivan narazılıq iştirakçileri baş prokurordan Permâkovnıñ Ermenistanda makeme etilmesini talap etken ediler.
