İşğal etilgen Qırımda cumaaqşamı, yanvar 15-de, «Qırım Cumhuriyeti Yuqarı mahkemesinde» «Qırım» Fondu» hayriye teşkilâtı işi boyunca mahkeme toplaşuvı keçirildi. QHA agentligi bildirgeni kibi, toplaşuv qırımtatarca keçmek kerek edi, amma mahkeme «buña azır degil eken».
«Qırım» fondunıñ başı Riza Şevkiyev aytqanı kibi, toplaşuvnıñ keçirilmesini muayyen bir sebeplerden başqa künge qaldırdılar.
«Mahkemeci işke toplaşuvnı nasıl etip qırımtatarca keçirmek kibi suali ile başladı. O, bizge muracaat etip, rus tiline keçmege rica etken edi, amma biz adliyecimiz ile, aqqımızdan faydalanıp, mahkeme toplaşuvını qırımtatarca keçirmege istegimizni bildirdik»,– dep añlattı Şevkiyev.
Onıñ sözlerine köre, mahkemeci bunı tehnikiy ceetten yapmağa qıyın olğanını qayd etti.
«Bunı etmek içün imkân qıdırdı. Oña qırımtatar tilinde keçirilecek mahkeme tarihiy olacağını ve o, tarihqa toplaşuvnı qırımtatarca teşkil etken mahkemeci olıp kirecegini añlattım», – dep tarif etti «Qırım» fondunıñ reberi.
Bundan soñ Şevkiyev mahkeme toplaşuvını başqa künde keçirmek içün muracaatnı yazdı. Mahkeme onı qabul etti.
Adliyeci Cemil Temişev aytqanı kibi, qırımtatarca keçirilgen mahkeme toplaşuvları tarihta daa yoq edi, böyle bir şey ilk sefer olacaqtır.
Haber etilgeni kibi, fondnıñ baş müdiri Riza Şevkiyev oña 350 biñ ruble, fonduna ise – 4,5 million ruble para cezasınıñ belgilenmesi boyunca Aqmescitniñ Kiyev rayon mahkemesiniñ qararına itiraz beyannamesini yazğan edi.
Fond ve onıñ başına nisbeten mahkeme toplaşuvları keçken sene dekabr ayında keçirilmek kerek edi, amma olarnı bir qaç kere başqa künge qaldırğan ediler. Şevkiyev mahkeme toplaşuvınıñ qırımtatar tilinde keçirilmesini de bir qaç sefer sorağan edi.
