İçtimaiy ağlarda peyda olğan malümatqa köre, İçki rayonı Varvarovka köyünde yaşağan Ukraina vatandaşları evleri üzerinde Ukraina bayrağını tiklegeni sebebinden işğal etilgen Qırımdan quvuldılar.
Qırım.Aqiqat mühbirleri bildirgeni kibi, İçki rayonı Varvarovka köyünde yaşağan Kiriçenko ailesi kerçekten de 2015 senesi yanvar 5 künü yarımadadan qıtaiy Ukrainağa köçti. Amma bunı öz istegi ile yapqanlar, çünki Ukraina vatandaşları olıp, Qırımda bulunmaqnıñ imkâniyetini artıq körmey ekenler.
«Biz Rusiye vatandaşlığını qabul etmeyip, Ukraina vatandaşları olıp qaldıq. Rusiye ordularınıñ kelgeni ile evimiz üzerinde Ukraina bayrağını tikledik ve yalıñız Qırımdan çıqqanımızda onı tüşürdik», – dep tarif ete aile azası Svetlana Kiriçenko.
Onıñ aytqanı kibi, Qırımda ukrain pasportları olğan ve Ukraina tarafını tutqan insanlar içün yaratılğan yaşayış şaraitlerinde bulunmağa imkânsızdır.
«Evimizde tintüv de keçirildi, ailemiz Ermeni Bazarda Mustafa Cemilevni qarşılav tedbirinde iştirak etkeni sebebinden mahkeme keçirilgen edi. Amma mahkemede bizni bu işke nasıl etip bağlamağa bilmey ediler, milletimiz qırımtatar degil de», – dey qadın.
Faqat, aile azalarında Rusiye pasportları olmağanı sebebinden olarnıñ ögünde büyük manialar peyda ola. Yani, Rusiye pasportını elde etmegen vatandaşlar tibbiy sigortanı alamaz, demek, kerek olğan vaqıtta, tibbiy yardımnı de körip olamazlar.
«Küçük balalarım bar, olarğa şimdi hastahanelerde aşılavnı bile etip olamayım», – dep şikâyet ete Svetlana Kiriçenko.
Qorantanıñ Varvarovka köyünde şahsiy tükânı bar edi, amma yañı yıldan onı qapatmağa mecbur oldılar.
«Ticaretimizni ğayrıdan qayd etip olamadıq, çünki bergi hızmetinde tek ukrain pasportları olğan insanlarnıñ degil de, atta Rusiye pasportlarını alğan vatandaşlarnıñ işlerini al etip olamaylar», – dep tarif ete Svetlana Kiriçenko.
Qırımda 2015 senesiniñ başında amelge keçken qanunlarğa köre, öz ticaretini ğayrıdan qayd etmegen vatandaşlar faaliyetine devam etip olamaylar.
Bunıñ ile Kiriçenkolar, Svetlana aytqanı kibi, «yarımada ukrain olğanından soñ», Qırımğa qaytmağa tüşüneler.
«Şu aylar devamında azbarımızda asılğan bayraqnı da qıtağa alıp çıqtıq. Qaytıp kelsek, onı kene asarmız»,– dey qadın.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
