Qırımtatar Milliy Meclisi Qırımnı işğalden azat etüv strategiyasınıñ metnni azırladı. Lâkin onı amelge keçirmek içün Meclisniñ Ukraina devlet akimiyeti ile sıqı iş tutması kerek.
Bunı Ukraina Nazirler şurasınıñ Qırım Muhtar Cumhuriyeti ve Aqyar meseleleri boyunca Departament yolbaşçısı, Qırımtatar Milliy Meclisiniñ reisi Aslan Ömer Qırımlı Qırım.Aqiqatqa bildirdi.
«Devletniñ Qırım yarımadasını işğalden azat etmek içün soñki yarım yıllıq faaliyetini talil etsek, devlet derecesinde işğal etilgen topraqlarnıñ qaytarılması boyunca aynı fikir yoq degen netice çıqarmaq mümkün», – dedi o.
Qırımlınıñ aytqanına köre, Ukraina Yuqarı Radasınıñ 12.08.2014 sanına ait «Ukraina Yuqarı Radasınıñ qırımtatar halqınıñ Ukraina Devleti terkibinde aq-uquqlarınıñ kefaleti aqqında beyanatı aqqında» qararı ile parlament Nazirler şurasına Ukrainanıñ icra akimiyet organları ve Qırımtatar Milliy Meclisi arasında işbirlik usullarını azırlamağa avale etti.
«Lâkin, şimdilik böyle bir usullar azırlanmadı, böyle etip Qırım yarımadasını işğalden azat etmek içün semereli areket etmege ve qırımtatar halqınıñ resmiy sesini eşitmege imkân yoq», – dedi Qırımlı.
Memurnıñ qayd etkenine köre, Nazirler şurası Ukrainanıñ icra akimiyet organları ve Qırımtatar Milliy Meclisi arasında işbirlik yollarını belgilep, bunı bir vesiqa ile tasdıqlamalı.
Ukraina prezidentiniñ qırımtatar halqı işlerinden vekâletlsi Mustafa Cemilev dedi ki, Yuqarı Rada 2015 senesiniñ yedvlet bücetini baqıp, işğal etilgen Qırımnı maliye etüv meselesine qulaq asmadı. Onıñ bildirgenine köre, Qırımnı qaytaruv strategiyası yoq.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
