Link açıqlığı

Qırımda belli ukrain şairi, publitsist, Qırım Muhtar Cumhuriyetiniñ nam qazanğan sanat erbabı ve Ukrainanıñ nam qazanğan jurnalisti Danilo Kononenko 73 yaşında vefat etti.

Bunı «Krımska svitlıtsâ» gazetasınıñ muarriri Viktor Kaçula Qırım.Aqiqatqa bildirdi. Kononenko bu gazetanıñ esasçılarından biri olıp, ömürniñ soñki kününe qadar anda çalıştı.

Kaçulanıñ aytqanına köre, Danilo Andreyeviç hastahanede insult neticesinde can berdi.

«Onıñ mikroinsultları endi olğan edi, lâkin çaresini tapqan ediler. Aynı vaqıtta o er zaman neşeli edi, böyle olacağını iç bir vaqıt tüşünmegen edim. Tünevin o hastahanege yattı, o birisi kün ise bizler yarın gazetada çıqacaq onıñ torunınıñ maqalesini tüzettik», – dedi Kaçula.

Şairniñ qızı dedi ki, Kononenkonıñ soñki sözleri: «Menim ğarip Ukrainam».

Kaçulanıñ bildirgenine köre, Kononenko soñki vaqıtları Qırımda ve memlekette olğan adise-vaqialarnı ağır keçire edi.

«O, bundan sebep pek kederlene edi, o yaşlı edi ve Ukrainada olıp keçken adise-vaqialar onıñ canını ağırta edi. Aynı zamanda o Qırımda, Aqmescitte qalıp, edebiyat bölügimizniñ ştattan tış muarriri olıp çalışa ve para almağan edi, çünki «Krımska svitlıtsâ – onıñ ayatı», – dep qayd etti Kaçula.

Onıñ aytqanına köre, Kononenkonıñ ukrain şairi Vasiliy Simonenkonıñ 70 yıllığına bağışlanğan hatıralar bastırılacaq edi, olar eskiden beraber çalışqan ediler.

«Bu cuma künü «Krımska svitlıtsânıñ» Kononenko hatıralarınıñ ilânı ile sanı çıqacaq, Danilo Andreyeviç ise artıq yoq. Lâkin biz bu hatıralarnı, elbet de, bastıracaqmız», – dedi Kaçula.

Onıñ malümatına köre, şairniñ cenaze merasimi cumaertesi künü, yanvar 17-de, keçirilecektir.

Danilo Andreyeviç Kononenko 1942 senesi yanvar 1-de Çerkassı vilâyetinde dünyağa keldi. Aliy tasilni Qırımda, Aqmescit pedagogik institutında aldı.

Danilo Kononenko Qırımda ukrain tili Cemiyetiniñ teşkilâtçılarından biri edi, onıñ ilk reisi olğan edi. O, Qırımdaki ilk ve yekâne ukrain gazetası – «Krımska svitlıtsânıñ» esasçılarından biri, Ukraina şairleri Milliy Birligi şurasınıñ azası, «Ukraina» Qırım cumhuriyet cemiyetiniñ reis muavini, Taras Şevçenko adına «Prosvita» Bütünqırım cemiyetiniñ idare azasıdır.

O – «Cerelo», «Na vesnânomu berezi», «Kvituçıh sonâhiv orkestr», «Z lübovi y dobra», «Mı vırostali v povoyenni rokı» şiiriyet cıyıntıqları, gazeta ve mecmualardaki maqalelerniñ müellifidir. Ukrain şairleriniñ «Qırımım, seni sevem» şiirler cıyıntığını tertip etti.

1999 senesinden itibaren «Cereltse» gazetasınıñ balalalar içün ilâvesiniñ baş muarriri oldı. Anda qırımtatar, beloruss yazıcılarınıñ eserlerini tercime etip, sıq-sıq bastıra edi.

Kononenko bir çoq qırımtatar şair ve yazıcısınıñ eserini ukrain tiline tercime etti.

XS
SM
MD
LG