Türkiye tış işler naziri Mevlüt Çavuşoglu bildirdi ki, Rusiye Türkiyege qırımtatarlar ile bağlı bergen vadelerni yerine ketirmedi.
Bunı o «Anadolu agentligine» bildirdi.
Rusiye prezidenti Vladimir Putinniñ Türkiye ziyareti vaqtında, Çavuşoğlunıñ aytqanına köre, Qırım meselesi muzakere etilgen edi.
Rusiyege qırımtatarlarğa yapılğan basqı ile bağlı bütün qorqular yetkizildi.
«Biz olarğa eki cedvelni berdik. Birincisi – Mustafa Cemilevnen körüşüv sebebinden cezalanğan 100 kişiniñ cedveli. Biz olarğa ğayıp olğan ve ölü tapılğan qırımtatarlarnıñ cedvelini de bergen edik», – dedi Çavuşoğlu.
«Vadeler yerine ketirilmedi», – dep qoştı o, qırımtatar tiliniñ resmiy statusı, qırımtatar siyasetçileriniñ akimiyette yer alması ve diger meseleler aqqında aytıp.
«Bizler bu vadelerniñ yerine ketirilmesini körmek ister edik. Yazıq ki, şimdige qadar olar yerine ketirilmedi. Rusiye – dostumızdır, lâkin bizler onıñ hataları aqqında da aytmaq kerekmiz», – dep ayttı Türkiye tış işler nazirliginiñ yolbaşçısı.
Çavuşoğlunıñ aytqanına köre, Vladimir Putin Qırımğa resmiy Türkiye eyyetini kirsetmege razı oldı. İşbu eyyet qırımtatar halqınıñ vaziyetini ögrenecek. Türkiye eyyeti eñ yaqın vaqıtta Qırımğa yol alacaq, dep ayttı Çavuşoğlu.
Onıñ qayd etkenine köre, Rusiye ile yahşı munasebetler Türkiyeniñ Rusiyeniñ Ukrainada yapqanlarına qoltutqanını ve Qırım işğalini tanığanını manasına kelmey.
Türkiye tış işler naziri Mevlüt Çavuşoğlu noyabr 10-da Kiyev ziyareti vaqtında jurnalistlerge Qırımğa yol alacaq eyyet aqqında bildirgen edi.
Uquq qorçalayıcılar qırımtatarlarğa yapılğan basqı aqqında bir çoq kere aytqan ediler. Ukraina tış işler nazirligi qırımtatarlarnıñ vaziyetini ekinci sürgünlik dep adladı.
