Ukrainada yanvar 15-i boyevikler ve Rusiyege qoltutqan separatistlerniñ areketleri neticesinde elâk olğan adamlar içün Matem künü olaraq ilân etildi. Bunı prezident Petro Poroşenko vilâyet devlet memuriyetleriniñ reisleri ile işçi körüşüvde bildirdi.
«Terroristlerniñ qollarından elâk olğanlar içün cumaaqşamı künü, yanvar 15-ni, Matem künü olaraq ilân etmege qarar aldım. Ve, eñ evelâ, Volnovaha civarındaki blokpostta elâk olğan adamlar içün. Rusiyege qoltutqan terroristler blokpostta turğan yolcu avtobusına ateş açtılar. Olar em ukrain askerleri, em de ukrain vatandaşlarını nişanğa aldılar», – dedi devlet yolbaşçısı.
Prezidentniñ qayd etkenine köre, bütün dünya Ukrainağa taziyeler bildire. BMT Havfsızlıq Şurasınıñ bunıñnen bağlı beyanatı aydınlatıldı, yanvar 15-te ise Avropa parlamenti Ukrainadaki facia boyunca qarar almalı.
Petro Poroşenko bildirdi ki, çarşenbe künü, yanvar 14-te, Almaniya kantsleri Angela Merkel ve Frenkistan prezidenti François Hollande telefon subetinde «ukrain halqına terror ile küreşte qoltutqanını aytıp, birdemlik bildirdiler».
Prezidentniñ matbuat hızmeti bildirdi ki, yanvar 13-te elâk olğanlarnı sükünet daqqası ile añdılar.
Malüm ki, salı künü, yanvar 13-te, saat 14:30 boyevikler Volnovaha civarındaki blokpostqa ateş açtılar. Anda bulunğan yolcu avtobusta on insan öldürildi. 18 kişi hastahanege tüşti. Birazdan olardan biri hastahanede can berdi.
