İşğal etilgen Qırımda 2015 senesi mart ayından itibaren topraq damartılarınıñ imtiyazlı berilmesi, şu cümleden zapt etilgen topraqlarnıñ berilmesi aqqında qanun işke tüşürilecek.
Bunı Qırım «Devlet şurasınıñ» mal-mülk ve topraq munasebetleri komitetiniñ reisi Yevgeniya Dobrınâ «Rossiya segodnâ» radiosınıñ yayınında çarşenbe künü, yanvar 14-te, bildirdi, – dep haber ete Qırımnıñ öz başına ilân etilgen ükümet «ruporı» Krıminform saytı.
Onıñ aytqanına köre, mart ayına qadar mesele çezilip, qırımlılarnıñ «topraq damartılarını almaq aqları yerine ketirilecek».
«Devlet ve belediye mülkinde olğan topraq damartılarınıñ berilmesi, ve bazı topraq munasebetleri aqqında» qanun 2014 senesi dekabr 24-te ekinci oquvda qabul etilgen edi.
Vesiqa topraqnı bedava alacaq insanlarnı belgiley.
Qanunğa binaen, 2016 senesi yanvar 1-ne qadar resmiyleştirilmegen topraq damartılarındaki inşaatlar yıqtırılacaq.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
