Link açıqlığı

Matbuat vastaları: Ukrainanıñ sabıq içki işler naziri Zaharçenko Qırımda «Cenüp-Şarq» fondunı taqdim etecek


Ukrainanıñ sabıq içki işler naziri Vitaliy Zaharçenko

İşğal etilgen Aqyarda yanvar 16-da «Cenüp-Şarq» hayriye fondu taqdim etilecek. Onıñ prezidenti Ukrainanıñ sabıq içki işler naziri Vitaliy Zaharçenko ola. Bu aqqında regional kütleviy haber vastalarına yollanılğan ilânda aytıla, – dep haber ete yanvar 14-te «Krım Media».

Neşirniñ malümatına köre, taqdim merasiminden ğayrı, «Berkut» mahsus bölüginiñ meydanğa ketirilüv kününe bağışlanğan bir sıra tedbir keçirilmesi planlaştırıla.

Tedbir programmasında resimler ve «Cenüp-Şarq ressamlarınıñ baqışı» fotoresimler sergisi, kontsert mevcut.

Bundan ğayrı, matbuat vastalarınıñ vekilleri içün Ukrainanıñ sabıq içki işler naziri brifing keçirecek.

İlânda hayriye fondunıñ hadimi olaraq taqdim etilgen Yevgeniy Rostetskiy telefon vastasınen bildirdi ki, Zaharçenko kerçekten de tedbirge qoşulacaq.

Fondnıñ taqdim merasimi ve diger tedbirler Aqyar bank işiniñ institutında keçirilecek.

Aqyar «ükümetiniñ» matbuat hızmeti ise mezkür tedbirden haberdar degil.

XS
SM
MD
LG