Ukraina vatandaşları, Qırım sakinleri, em de mecburen köçip kelgen insanlar aqımdaki seneniñ mart-aprel aylarından itibaren biometrik pasportlarnı ala bileler.
Bu aqqında Ukraina prezidentiniñ Qırım temsilciligi saytında haber etile.
Berilgen malümatqa köre, bu müddet içinde 200 biñ pasport berilecektir. İşğal etilgen Qırım sakinleri muracaat ete bilecek Ukrana Devlet migratsion hızmetiniñ Herson vilâyetindeki idaresi biometrik pasportnı alacaq olğan insanlardan 41 ariza qabul etti.
20 kün içinde pasport resmiyleştirilmesi 518 grivna 15 kapikni teşkil etecek (olardan 257 grn. 15 kapik – devlet bücetine berilecek para, 261 grn. – blank fiyatı). Vesiqa, eskiden olğanı kibi, 10 yılğa berile.
Bundan ğayrı, vesiqanı 7 iş künü içinde resmiyleştirmek imkânı bar. Böylece, elektron çip ile pasport fiyatı 775 grn. 30 kapikni teşkil etecek.
