Link açıqlığı

Saatnıñ esas haberi

Qırımtatar Milliy Meclisi Aqmescit ve Aqyarda matem mitinglerini keçirecek ola


Qırımtatar Milliy Meclisi fevral 23 künü Aqmescit ve Aqyarda Qırım Halq Cumhuriyetiniñ birinci reisi, I Qırımtatar Milliy Qurultayınıñ teşkilâtçısı, Qırım, Poloniya, Aqrusiye ve Litvaniya müftisi Noman Çelebicihan ölüminiñ 97 yıllığı munasebeti ile matem mitingini keçirecek ola, dep bildire QHA agentligi.

Meclis kâtibiyetiniñ reberi Dilâver Akiyev aytqanı kibi, bu munasebet ile ötkerilecek tedbirler arasında, matem mitinglerinden ğayrı, milliy mektep talebeleri arasında edebiy yarışnıñ keçirilmesi de planlaştırıla. Bundan da ğayrı, Qırım müendis pedagogika universitetinde Küreş yarışı keçirilecek.

«Meclisniñ toplaşuvında mitinglerni keçirmek kibi qarar alınsa, biz, qanun boyunca, şeer icraiy komitetine kütleviy tedbirlerniñ keçirilmesi aqqında vesiqalarnı teslim etermiz»,– dedi Akiyev.

Qırım.Aqiqat bergen malümatqa binayen, Qırımtatar Milliy Meclisi Prezidiumınıñ yanvar 12 künü keçirilgen toplaşuvınıñ neticesinde Qırımtatar Milliy Meclisiniñ nevbetteki körüşüvini 2015 senesi fevralniñ başında keçirmek kibi qarar alındı.

Noman Çelebicihan – qırımtatar cemaat erbabı, Qırım Halq Cumhuriyetiniñ birinci reisi, I Qırımtatar Milliy Qurultayınıñ teşkilâtçısı, Qırım, Poloniya, Aqrusiye ve Litvaniya müftisi edi. Qırımtatarlarnıñ milliy marşı olğan «Ant etkenmen» şiiriniñ müellifi olaraq bellidir. 1918 senesi Qırımda bölşevizmniñ qurbanı oldı. Yanvar 26 künü apiske atıldı, fevral 23 künü Aqyarda gemiciler tarafından öldürildi, cesedi Qara deñizge atılğan edi.

XS
SM
MD
LG