Salı künü, 2015 senesi yanvar 12-de, Aqmescitte Qırımtatar Milliy Meclisiniñ Prezidiumı toplaştı. Toplaşuvda qırımtatarlarnıñ temsiliy organı olğan Meclisniñ nevbetteki körüşüv tarihını muzakere ettiler.
Bunı Meclisniñ matbuat hızmeti bildire.
Toplaşuvda prezidiumnıñ 12 azasından doquzı iştirak etti. Bunıñ ile Qırımtatar Milliy Qurultayınıñ Teftiş komissiyası reisi Ali Özenbaş ve Qurultaynıñ Merkeziy Saylav komissiyasınıñ reisi Zair Smedlâyev de qoşuldılar. Prezidium toplaşuvını Meclis reisiniñ muavini Ahtem Çiygoz alıp bardı.
Evelden qararlaştırılğan kün tertibinde üç mesele baqıldı. Şu cümleden, matbuat hızmetiniñ malümatına köre, toplaşuvda Qırım Halq Cumhuriyetiniñ birinci reisi, I Qırımtatar Milliy Qurultayınıñ teşkilâtçısı, Qırım, Poloniya, Aqrusiye ve Litvaniya müftisi Noman Çelebicihan ölüminiñ 97 yıllığı munasebeti ile keçirilecek tedbirlerni muzakere ettiler.
Bunıñ ile Qırımtatar Milliy Meclisiniñ 2015 senesi birinci üç ayında yapılacaq işini ve Qırımtatar Milliy Qurultayınıñ Teftiş komissiyasınıñ Qırımtatar Milliy Meclisine olğan muracaatlarını baqıp çıqtılar.
Toplaşuvnıñ neticesinde Qırımtatar Milliy Meclisiniñ nevbetteki körüşüvini 2015 senesi fevralniñ başında keçirmek kibi qarar alındı.
