İşğal etilgen Qırımda Vernadskiy adına Qırım federal universiteti Tavriya akademiyasınıñ reberligi (sabıq Tavriya milliy universiteti) aliy oquv yurtında ocalarnıñ sayısını qısqartacaq.
Bunı Mustaqil devletler birliginiñ memleketleri institutınıñ Qırım filialında Vernadskiy adına QFU siyasiy ilimler kafedrasınıñ dotsenti Anatoliy Filatov bildirdi, – dep haber ete «Novosti Krıma».
Böylece, tarih ve felsefe fakultetlerini birleştirip, ocalarnıñ sayısını 11-ge qadar qısqartmağa planlaştırıla.
«Bundan ğayrı, er bir ocanıñ saat sayısı bir biñni teşkil etecek», – dep qoştı Filatov.
Malüm ki, Rusiye ükümeti Qırımda federal universitetni meydanğa ketirmege avale etti. Onıñ terkibine yedi oquv yurtı ve yedi ilmiy teşkilât kirdi. QFU müdiri Sergey Doniç oldı. Aliy oquv yurtınıñ prezidenti olaraq Nikolay Bagrov saylandı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
