Ukraina Yuqarı Radası Almaniya kantsleri Angela Merkel, Frenkistan prezidenti François Hollande ve Rusiye prezidenti Vladimir Putinge muracaatnı qabul etip, Rusiye Federatsiyasında qanunsız alda apiste tutılğan Ukrainanıñ sekizinci çağırılış halq deputatı Nadejda Savçenkonı azat etmege çağırdı.
Buña 304 halq deputatı rey berdi, dep haber ete Radio Svoboda.
Muracaatta qayd etile ki, parlament halqara birdemlikke ümüt beslep, Merkel, Hollande ve Putinden Savçenko, em de ukrain rejissöri Oleg Sentsov ve Rusiye Federatsiyasında qanunsız alda apiste bulunğan diger Ukraina vatandaşlarınıñ azat etilmesi içün kerekli tedbirler yapılmasını istey.
Qararğa binaen, Ukraina tış işler nazirligine Almaniya, Frenkistan ve Rusiye Federatsiyasınıñ Tış işler nazirliklerini mezkür muracaat mündericesi ile tanış etmege avale etile.
Bundan ğayrı, Yuqarı Rada Nadejda Savçenko boyunca PACE muracaatını qabul etti. Halq deputatları 2015 senesi yanvar 26-30 künleri keçirilecek Avropa Şurası Parlament Assambleyasınıñ sessiyasında Savçenko, Sentsov Rusiye Federatsiyasında qanunsız alda apiste bulunğan diger Ukraina vatandaşlarınıñ azat etilmesi talabı ile rezolütsiyanı qabul etmege çağıralar.
2014 senesi noyabr ayında Yuqarı Rada Rusiye Devlet Duması ve Rusiye prezidenti Vladimir Putinge ukrain uçucısı Nadejda Savçenkonıñ azat etilmesi aqqında muracaatnı qabul etti.
Savçenko «Batkivşçına» cedveli boyunca Ukraina Yuqarı Radasına saylandı.
2014 senesi dekabr 25-te Ukraina Yuqarı Radası ukrain uçucısı Nadejda Savçenkonı Avropa Şurası Parlament assambleyasında Yuqarı Rada eyyetiniñ erkânına kirsetti.
Nadejda onı yanvar 26-na qadar, PACE toplaşuvından evel azat etmege talap ete. Onı azat etmeseler, Avropa Şurasınıñ tarihında ilk sefer memleket azalarından biri, Rusiye, diger memleket azasını apiste tutacaq.
2014 senesi dekabr 13-te Nadejda Savçenko açlıqqa başladı.
