Yarımadada Rusiye bankları 2015 senesine qadar belgilengen keçici müddet soñuna yetkeni ile grivnalarnı bozmaqtan vazgeçtiler.
Bunı akimiyet tarafını tutqan Krıminform saytına RNKB bankında bildirdiler.
«Ukraina peşin paranıñ satın aluvı/satuvı RNKB bölüklerinde keçici müddet devamında keçirile edi», – dep qayd eteler bankta.
Yılbaş bayramlarından soñ yarımada sakinleri grivnalarnı rublelerge artıq bozıp olmaylar.
Malüm olğanı kibi, 2015 senesi yanvar 1-den itibaren işğal etilgen Qırımda Rusiye qanunlarına köre para birlemini yalıñız bank bölüklerinde satın almaq ya da satmaq mümkün.
İşğalden soñ yarımadada ukrain bankları qapatıldı, olarnıñ yerinde Rusiye bankları işke başladı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
