Avropa birligi Qırım işğalini tanımayıp, işbu mevzuda tedbirlerniñ keçirilmesine azırlıq köre.
Bunı Kоmmersant gazetasına Latviya çetel işler nazirliginiñ başı Edagr Rinkeviç bildirdi.
«Buzlatılğan ziddiyet» olaraq adlanılğan bir sıñırğa yaqlaştıq, menimce. Bu endi uzun zamanğa sürecek, bunı añlamaq kerek. Avroрa birligi tarafından Qırımnıñ işğali ya da qoşuluvı qabul etilmeycek, bu sebepten biz bir sıra tedbirlerni keçirmege azırlanamız. Bu mevzuda keçirilecek nasıldır bir muzakereler tek Ukraina topraq bütünliginiñ ürmet etüvinden başlana bilecek», – dedi o.
2015 senesi yanvar 1-den Avropa Birligi Şurasında reislik Latviyağa keçti.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
