Link açıqlığı

Aqyarda «Pamâtnik Matrosu Koşke» naqliyat turağı yanındaki evniñ divarında graffiti ile tasvir etilgen Rusiye prezidenti Vladimir Putinniñ közlerini boyaladılar, dep bildire yerli Primeçaniya saytı.

Yani, gece bir kimse damdan dağcılıq techizatı ile enip, prezidentniñ közlerini üstünden boyaladı.

Neşir yazğanı kibi, yerli sakinler bu evelden planlaştırılğan bir areket olğanını tüşüne.

«Leyha reberi şimdi mında degildir, amma imkâniyet peyda olsa, biz aman ressamlarnı yollap, portretni tüzetirmiz»,– dep añlatalar işbu graffitiniñ teşebbüsçisi olğan «Set» cemaat teşkilâtında.

Putin portretini «Tuvğan limanğa hoş keldiñ» degen yazısı ile Moskva ressamları «referendum»dan soñ yapqan ediler.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG