Link açıqlığı

Saatnıñ esas haberi

Biometrik pasportnı elde etkenlerniñ arasında Qırımdan kelgen istidatlı yaş ukrain qızçığı da bar edi


Qırımdan kelgen istidatlı pianinocı Hrıstına Mihayliçenko
Qırımdan kelgen istidatlı pianinocı Hrıstına Mihayliçenko

Kiyevde bazarertesi künü, yanvarniñ 12-de, tantanalı sürette birinci biometrik pasportlarnı taqdim ettiler. Qırım.Aqiqat saytına belli olğanı kibi, yañı vesiqanı birinci olaraq Ukraina prezidenti Petro Poroşenko elde etti. Onıñ artından biometrik pasportlarnı Maydan faallerine, medeniyet ve sanaat erbaplarına taqdim ettiler.

Davetlilerniñ arasında biometrik pasportnı elde etken yekâne bala Qırımdan kelgen istidatlı yaş ukrain qızçığı Hrıstına Mihayliçenko oldı. Yaqında o Felemenkte genç pianinocılarnıñ halqara yarışında ğalebe qazanıp qayttı.

Hrıstına Mihayliçenkonıñ aytqanı kibi, prezident odağa kirgende, qızçıqqa kelip, onı selâmladı. Genç qırımlı Petro Poroşenkoğa köçip kelgenlerniñ ailelerinden olğan istidatlı balaçıqlarnıñ eserleri ile diskni ediye etti.

«Petro Oleksiyovıç kirgende, başta maña qolunı uzatıp: Aydın künler, küneşçik, seni körmege memnünim», dedi. Onı pek begendim: açıq yürekli, merametli, ve, menimce, insaflı ve biraz oşlu bir insandır», – tarif etti Qırım.Aqiqatqa Hrıstına Mihayliçenko.

O şunı da qayd etti ki, vesiqalarnı elde etkenler öz ikâyeleri ile paylaşa edi.

«Men ukrainalı olğanımını ve muzıka ile oğraşqanımını añlattım. Çetelde keçirilecek bütün yarışlarda memleketim Ukraina ve şeerim Kiyevni taqdim etmege isteyim» – dedi Hrıstına Mihayliçenko.

Yaş pianinocı ayttı ki, öz biometrik pasportı ile o, martnıñ soñunda, Felemenkte keçirilecek kontsertke baracaq eken, yazda ise Mihayliçenko Almaniyada ötkerilecek pianinocılarnıñ yarışında iştirak etecektir.

Qırım.Aqiqat bildirgeni kibi, Kiyevge işğal etilgen Qırımdan «referendum»dan soñra ailesi ile köçip kelgen doquz yaşında Hrıstına Mihayliçenko Felemenkte keçirilgen pianinocılarnıñ halqara yarışında ğalebe qazanğan edi.

XS
SM
MD
LG