İşğal etilgen Qırımda Ukraina banklarınıñ müşterilerine tahminen 30 milliard ruble miqdarında tazmin ödenildi. Bunı bazarertesi künü, yanvar 12-de, Qırım «prokurorı» Natalya Poklonskaya öz Facebook saifesinde bildirdi.
«Qırım Cumhuriyeti prokuraturasınıñ qarışuvından soñ Ukraina banklarınıñ müşterilerine tahminen 30 milliard ruble miqdarında tazmin ödenildi», – dep yazdı o.
«Tazminatnı Qırımnı terk etken «Privatbank», «Oşçadbank» ve diger banklarnıñ müşterileri elde etti»,– denile beyanatta.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
