Link açıqlığı

Pariste yanvar 7 ve 9 künleri yüz bergen ve neticede 13 insannıñ ölümine sebep olğan terroristik areketler Rusiye Federatsiyası içün elverişlidir.

Bunı bazar künü TSN programmasınıñ canlı efirinde qırımtatarlarnıñ milliy yetekçisi, Ukraina halq deputatı Mustafa Cemilev bildirdi.

«Bu kibi facialar yüz bergen vaqıtta cemaatçılıq fikir yürsetmege başlay – bu kimniñ menfaatında ola bile, aceba. Neticede işbu teraktlar Rusiye içün elverişli olğanını añlamaq mümkün. Bunı cemaatçılıqnıñ Rusiye tarafından Ukrainağa nisbeten etilgen terrorizmge olğan diqqatını «islâm terrorizmine» çekmek içün yapalar», – qayd etti Cemilev.

Halq deputatı aytqanı kibi, bu kibi teraktlar radikal «faşist»lerniñ areketlerini daa da faal ete bile.

«Bu cinayetçilik Mari Le Pen firqasını («Milliy front», ödünç Rusiye tarafından berilgen edi, – muar.) ve diger memleketlerde – Macaristan ve Bulğaristanda olğan «faşistler»ni areketke celp etecek. Olar ise, öz nevbetinde, körgenimiz kibi, ekseriy allarda Rusiye tarafını tutalar»,– dedi Cemilev.

Cemilev Charlie Hebdo satirik mecmuasınıñ muarririyetine etilgen ücümge Moskvanıñ alâqası bar olğanı aqqında aytqan edi.

Öldürüvler Frenkistanda yanvar 7 künü Charlie Hebdo muarririyetine etilgen ücüm ile başlandı. Üç kün devamında 17 insan, şu cümleden 3 politsiya hadimi elâk oldı. Eki ameliyat neticesinde cuma künü üç terroristni öldürdiler.

Yanvar 10 künü Frenkistanda tahminen 700 insan zulum qurbanlarınıñ hatırasına keçirilgen matem tedbirlerinde iştirak etti.

XS
SM
MD
LG