Pakistanda yolcu avtobus benzovoz ile çatışqanından sebep eñ azından 57 insan elâk oldı. Bunı Ukrinform bildirdi.
Avtobus qarşıdan kelgen benzovozğa urundı, neticede eki naqliyat vastası tutaştı.
«Şimdilik 57 ceset bar, amma işbu sayı daa arta bile, çünki cesetlerniñ çoqusı yanıp, bir-birinden ayırılmay», ─ dep bildirdi ekim Semi Camali.
Ekimniñ aytqanı kibi, cesetler öyle alğa keldiler ki, olarnı endi yalıñız DNK ekspertizası ile belgilemek mümkün.
Şaatlarnıñ sözlerine köre, yalıñız üç yolcu sağ qaldı. Avtobusnıñ aydavcısı da elâk oldı.
