Yanvar 10 künü, cumaertesi, «QHA» bildirgeni kibi, işğal etilgen Qırımda belli ekim-urolog, tibbiy ilimler namzeti, Qırımtatar Мilliy Qurultayınıñ vekili İsa Cemilev yürek tutuşqanından sebep vefat etti.
«İsa Cemilev Semaşko adına Cumhuriyet klinik hastahanesinde çalışa edi. Tecribeli mütehassıs olaraq belli edi, oña yalıñız urologiya saasında degil de, tibbiyetniñ diger sualleri boyunca da mesleat almaq içün muracaat ete ediler», – denile beyanatta.
İsa Cemilevniñ cenazesi yanvar 11 künü, saat 14.00, Aqmescit, Beloye-2, Dunayskiy,11 adresi boyunca keçirilecek.
İsa Cemilev 1959 senesi mart 10 künü doğdı. Andican Devlet Tibbiy Universitetiniñ mezunı oldı. 1993 senesi Baku şeerinde namzetlik işini qorçaladı ve mart 10-da, öz doğğan kününde, Qırımğa qayttı.
1993 senesinden itibaren Semaşko adına Cumhuriyet klinik hastahanesiniñ Urologiya bölüginde çalışa edi. Evli olıp, dört balanı terbiyeley edi.
