İşğal etilgen Qırımda bulğar cemiyetiniñ bazı vekilleri yarımadada regional milliy-medeniy cumhuriyetni qurmağa isteyler. Bunı cumaertesi künü, yanvar 10-da, «Novosti Krıma» neşiri bildire.
«İzvor» bulğar medeniyet merkeziniñ matbuat hızmeti bildirdi ki, bulğarlarnıñ Paisiy Hilendarskiy adına Qırım cumhuriyet cemiyeti 20 yıllığını konferentsiya ve kontsert ile qayd etti.
«Cemiyetniñ yubileyi Qırımnıñ Rusiye Federatsiyasına qaytuv yılına rastkeldi, bu sene yarımadanıñ bütün halqlarına yañı imkânlar bere. Delegatlar Qırımda regional bulğan milliy-medeniy cumhuriyetni qurmağa qarar aldılar», – aytıla beyanatta.
Rusiye qanunlarına köre, cumhuriyet statusı cumhuriyet ve devlet bücetlerinden medeniyet, tarihiy miras, anane ve til saqlanmasına para almağa imkân bere.
«Bulğarlarnıñ yerli milliy-medeniy cumhuriyetleri Aqmescit ve Yaltada endi bar. Olar regional strukturanıñ temeli olacaqlar», – dep bildirdiler «İzvor» medeniyet merkezinde.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
