İşğal etilgen Qırım ile memuriy sıñırda ve terrorizmge qarşı tedbirler keçirilgen yerlerde uçucısız apparatlarnıñ uçuşları sıq-sıq ötkerilip başladı. Bunı cuma künü, yanvar 9-da, brifingde ATO spikeri, polkovnik Andriy Lısenko bildirdi, – dep haber ete UNN.
«İlk malümatlarğa köre, terroristler uçucısız apparatlarnı sıq-sıq qullanıp başladılar. Böylece, keçken sutka içinde Denejnikove, Şçerbak, Panteleymonovka, Sçastye, Çmirovka. Kramatorsk ve Glinka mesken yerleri üzerinde 8 uçuş qayd etildi», – dedi Lısenko.
Onıñ bildirgenine köre, Berdânsk bölüginiñ «Çongar» ve «Blagoveşçenka» sıñırcıları ve Herson bölüginiñ «Krasnıy Çaban» sıñırcıları vaqtınca işğal etilgen Qırım ile memuriy sıñır boyu uçqan dört vertolötni qayd ettiler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
