Qırımnıñ öz başına tayin etilgen baş naziri Sergey Aksönov dey ki, Ukraina halq deputatı Mustafa Cemilevniñ Paris faciasına Moskvanıñ alâqası bar olğanı aqqında sözleri «onıñ zengin tasavurınıñ neticesidir».
Bunı Aksönov yanvar 9-da, cuma künü, brifing devamında bildirdi, – dep haber ete Qırım akimiyetiniñ matbuat hızmeti.
«Saçmalıqnı izaatlamağa istemeyim. İnsanlarnıñ zengin tasavurı bar, başqa işleri olmasa, olar bu kibi saçma-sapan şeyler ile oğaraşalar. Prezidentimiz Vladimir Vladimiroviç Putin sulhniñ tarafdarı ola. Eger de o olmasa edi, bir çoq ketişatnıñ neticesi radikal olur edi. Cemilev kibi şahıslarnıñ bu kibi bildirüvleri şaşırta: böyle insanlarğa cemiyetke yaqın olmağa imkân bermege mümkünmi?», – dedi Qırımnıñ öz başına tayin etilgen baş naziri.
Qırım.Aqiqat saytı bildirgeni kibi, prezidentniñ qırımtatar halqı işlerinden vekâletlisi, Ukraina halq deputatı, qırımtatar halqınıñ lideri Mustafa Cemilev Paris faciasına Moskvanıñ alâqası bar olğanını red etmey.
Malüm ki, çarşenbe künü, yanvar 7-de, Charlie Hebdo muarririyetine yapılğan ücüm neticesinde 12 insan öldürildi, 11 kişi yaralandı. Politsiya malümatına köre, şaatlar bildire ki, ücüm etkenler «Allahu akbar» ve «bizler peyğamberimiz içün intiqam alamız», dep qıçıra ediler.
«İslâm devleti» ve diger cihad birleşmeleriniñ tarafdarları saytılarında bildireler ki, ücüm içün mesülietni alalar.
Frenkistannıñ musulman toplulıq liderleri ise ücümni takbih ettiler.
«Charlie Hebdo» satirik mecmuası 2006 senesinde populâr oldı. O vaqıt mecmua Muhammed peyğamberine karikaturalarnı bastırğan edi. Musulman dünyası narazılıq bildirmege başladı.
