Prezidentniñ qırımtatar halqı işlerinden vekâletlisi, Ukraina halq deputatı, qırımtatar halqınıñ lideri Mustafa Cemilev Paris faciasına Moskvanıñ alâqası bar olğanını red etmey. Bunı o cuma künü, yanvar 9-da, depo.ua izaatlarında bildirdiyu
«Şimdilik Parij adiselerine kimniñ alâqası bar aytıp olamayıq. Men İstanbulda bulunam ve bu mevzuda subetleşem. İGİL iştiragi red etilmey, lâkin yol köstergen el Rusiyeden ola bile», – dep qayd etti o.
«İGİL – mustaqil bir küç degil. Bu facia islâmğa qarşı qullanıla bile, ve, doğrusını aytqanda, bunıñ içün yapılğandır. Anda rus qolu ola bilecegi aqqında tam bir malümat yoq. Bir çoq mütehassısnıñ fikirince, Moskva Frenkistannıñ diqqatını Rusiyeniñ Ukraina istilâsına qarşı areketlerinden islâmğa qarşı yoluna, belki de, Avropa birliginiñ dağıtılmasına aylandırmaq içün bunı da yapa bile», – dep qayd etti Mustafa Cemilev.
Malüm ki, çarşenbe künü, yanvar 7-de, Charlie Hebdo muarririyetine yapılğan ücüm neticesinde 12 insan öldürildi, 11 kişi yaralandı. Politsiya malümatına köre, şaatlar bildire ki, ücüm etkenler «Allahu akbar» ve «bizler peyğamberimiz içün intiqam alamız», dep qıçıra ediler.
«İslâm devleti» ve diger cihad birleşmeleriniñ tarafdarları saytılarında bildireler ki, ücüm içün mesülietni alalar.
Frenkistannıñ musulman toplulıq liderleri ise ücümni takbih ettiler.
«Charlie Hebdo» satirik mecmuası 2006 senesinde populâr oldı. O vaqıt mecmua Muhammed peyğamberine karikaturalarnı bastırğan edi. Musulman dünyası narazılıq bildirmege başladı.
