Qırımnıñ öz başına ilân etilgen baş naziri Sergey Aksönov dedi ki, Qırımda sürgün olunğan grajdanlar aprel 1-den itibaren topraq damartılarını alacaqlar. Bunı yanvar 9-da Qırım «ükümetiniñ» matbuat hızmeti bildirdi.
«Devlet ya da belediye mülkinde olğan topraq damartılarınıñ berilmesi ve bazı topraq meseleleri aqqında» Qırım Cumhuriyetiniñ qanunı ve Rusiye Fderatsiyası prezidentiniñ sürgün olunğan halqlarnıñ reabilitatsiyası aqqında buyruğı altında qalğan qırımlılar aprel 1-den itibaren topraq damartılarını alacaq», – aytıla beyanatta.
Aksönovnıñ aytqanına köre, fevral 1-den itibaren Qırımnıñ yerli idare organları vesiqalarnı qabul etecekler.
«Aprel 1-ne qadar yerli akimiyet organları qanun ve prezidentniñ vatandaşlarnıñ reabilitatsiyası aqqında buyruğına ait adamlarğa berilecek topraq damartılarınınıñ cedvelini tizmeli. Aprel 1-de topraq berilecek. Topraq damartılarınıñ cedveli elektron şeklinde de tizilecek. Bu sene devamında bizler işbu qanunnı yerine ketirmek kerekmiz», – dep ayttı Sergey Aksönov.
Onıñ bildirgenine köre, qanunğa köre 300 biñ qırımlı topraq saib iola bile, lâkin «bu raqam tüzetilecek».
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
