Frenkistan politsiyası üçünci kün Charlie Hebdo satirik mecmuasınıñ muarririyetine ücüm etkeninde qabaatlanğan ağa qardaş Şerif ve Said Kuaşilerni qıdırmağa devam ete.
Politsiya hadimleriniñ ğayreti şimdi Frenkistannıñ şimaliy-ğarbında olğan Pikardiyada toplanılğandır, mında eki qaabatlı şahıs yaqarlıq stantsiyasını çaypap ketken edi, haber ete Radio Svoboda.
Mecmua ofisinde çarşenbe künü 12 insan atış qurbanı oldı, olardan 8 jurnalist ve ekisi – politsiya hadimi. Daa 11 insan yaralandı, dörtü şimdi ağır vaziyette buluna.
Taqiqatnıñ bildirgeni kibi, Kuaşiler islâm boyevikleri olıp, Charlie Hebdo mecmuasından Muhammed Peyğamberge etken karikaturalar içün intiqam alğanlar.
Şerif ve Said Kuaşi pariste dünyağa keldiler. Ana-babası – Cezairden çıqqanlar. 2008 senesi şimdi 32 yaşında olğan Şerif boyeviklerniñ İrakqa yollanuvına alâqası olğanı içün üç yıllıq apis cezasınа oğradı.
Frenkistanda yanvar 8 künü milliy matem künü olaraq ilân etildi, ücüm qurbanlarnıñ hatırasına çeşit numayışlarnıñ keçirilmesi devam ete.
Yanvar 9 künü Paris Şurasınıñ mahsus toplaşuvında Charlie Hebdoğa şeerniñ itibarlı vatandaşı statusını bermek kibi mesele baqılacaq.
