Qazahistan prezidenti Nursultan Nazarbayev Almaniya kantsleri Angela Merkel ile körüşmek içün yanvar 9 künü Berlinge kele, dep haber ete Radіo Svoboda.
Dialognıñ devamında Ukraina şarqındaki ziddiyetniñ çezilmesi ve devlet başlarınıñ Astanada olacaq körüşüvi muzakere etilecek, dep bildirdi alman ükümetiniñ temsilcisi Şteffen Zaybert.
Beklenilgeni kibi, Ukraina, Almaniya, Frenkistan ve Rusiye çetel işler nazirleri yanvar 9 künü telefon boyunca konferentsiyanı keçirip, minsk añlaşmalarınıñ amelge keçirilüv ketişatını muzakere etecek olalar. Bunıñ ile kelecek aftanıñ başında dört memleketniñ çetel işler nazirleriniñ şahsiy körüşüvi de keçirile bile.
Ukraina baş naziri Arseniy Yatsenük ile Berlinde yanvar 8 künü keçirilgen muzakerelerden soñ Angela Merkel Astanada ola bilecek körüşüv aqqında «bu künleri keçirilecek muzakerelerden soñ belli olacağı»nı bildirgen edi.
